İqtisadi İslahatların Təhlili və Kommunikasiya Mərkəzinin (İİTKM) növbəti "Video icmal"ı Prezident İlham Əliyevin son bir il ərzində həyata keçirdiyi quruculuq işləri, beynəlxalq layihələr və biznes, sosial və struktur islahatlarına həsr olunub.Mərkəzdən AZƏRTAC-a bildirilib ki, "Video icmal"da Azərbaycanda aparılan köklü islahatlar 2018-ci il aprelin 11-dən başlayaraq ardıcıllıqla hər bir ay üzrə təqdim olunub. Bildirilib ki, İlham Əliyev prezidentlik fəaliyyətinə şəhid ailələrinə kompensasiya verilməsi barədə Fərmanı imzalaması ilə başlayıb və sosial siyasət daim prioritet olub. Son bir il ərzində "Məşğulluq haqqında" yeni Qanun, 2019-2030-cu illər üçün məşğulluq strategiyası qəbul edilib. İcbari tibbi sığortanın tətbiqi, şəhid ailələrinə kompensasiyaların verilməsi, əmanətlərin tam sığortalanması müddətinin uzadılması, minimum aylıq əməkhaqqının 38,5 faiz artırılması, tələbə təqaüdlərinin əsaslı artımı, məcburi köçkünlərin və hərbi qulluqçuların ailələrinə müavinətlərin artırılması, həmçinin fiziki şəxslərin problemli kreditlərinin həlli ilə bağlı vacib qərarlar qəbul olunub.
"Video icmal"da biznes islahatlarına geniş yer verilib: vergi və gömrük islahatları, biznesə başlama, tikinti icazələri, elektrikə qoşulma, elektron məhkəmə və sair istiqamətlərdə islahatlar qeyd edilib.
Eyni zamanda, son bir il ərzində Prezidentin rəhbərliyi ilə həyata keçirilən iqtisadi və infrastruktur layihələri barədə geniş məlumat təqdim edilib. Qeyd olunub ki, Bakı Beynəlxalq Dəniz Ticarət Limanı Kompleksinin fəaliyyətə başlaması, Cənub Qaz Dəhlizinin rəsmi açılışı, TANAP qaz kəmərinin istismara verilməsi, regionun ən böyük külək elektrik parkı "Yeni Yaşma" Külək Elektrik Parkının, Lənkəran Olimpiya İdman Kompleksinin, Türkiyə tarixinin ən böyük xarici sərmayəsi "Star" neft email zavodunun açılışı və "Yaşıl dəhliz"in tətbiqi həyata keçirilən mühüm işlərdir. Bu vaxt ərzində qeyri-neft sektorunun ən böyük layihəsi "SOCAR karbamid"in və "SOCAR Polymer"in fəaliyyətə başlaması Azərbaycan üçün tarixi əhəmiyyət kəsb edib.
Aparılan dərin islahatlar Azərbaycanın "Doing Business 2019" hesabatında dünyanın ən çox islahat aparan ölkəsi seçilməsi ilə nəticələnib və ölkəmiz 190 dövlət arasında 25-ci olub. Son bir ildə Azərbaycan "İqtisadi Azadlıq İndeksi"ndə də 7 pillə irəliləyib.
Həmçinin bu müddətdə Prezident İlham Əliyevin rəhbərliyi ilə idarəetməni daha çevik, yığcam və məqsədyönlü edəcək önəmli struktur islahatları həyata keçirilib.
"Video icmal"la İqtisadi İslahatların Təhlili və Kommunikasiya Mərkəzinin www.iqtisadiislahat.org saytındakı icmallar bölümündə bu link vasitəsilə tanış olmaq mümkündür: http://iqtisadiislahat.org/vreview.
Saytda axtar
XƏBƏR LENTİ
