Azərbaycanın da təmsil edildiyi Daşkənddə keçirilən Dəmir yolu üzrə Əməkdaşlıq Təşkilatının Nazirlər Şurasının Müşavirəsinin (DƏTNŞM) 47-ci sessiyası başa çatıb.

AZƏRTAC xəbər verir ki, sessiyada təşkilatın üzv 27 ölkənin nümayəndələri, bir sıra beynəlxalq təşkilatların təmsilçiləri iştirak edib.

Ölkəmizi tədbirdə “Azərbaycan Dəmir Yolları” QSC-nin Hüquq idarəsinin rəisi Nicat Quliyev, Maliyyə və iqtisadiyyat idarəsinin rəis müavini Fuad Rəfiyev və Beynəlxalq əlaqələri idarəsinin rəis müavini Fərid Mehdiyev təmsil edib. Sessiyada DƏTNŞM-in 2018-ci il üzrə hesabatı dinlənilib, ötən ilin nəqliyyat siyasəti və inkişaf strategiyası üzrə komissiyasının nəticələri elan olunub, 2020-ci ildə hayata keçiriləcək Tədbirlər Planı təsdiq edilib.

Tədbirdə DƏTNŞM-in Büdcə Komitəsinin 2019-2020-ci illər üçün planı, Müşavirənin 2021-ci və sonrakı illər üçün Proqramı, birgə layihələrin həyata keçirilməsi, bu sahəyə yeni innovasiya texnologiyalarının cəlb edilməsi, tarif siyasəti, yeni nəqliyyat dəhlizlərinin tətbiqi və bir sıra digər məsələlərə baxılıb, Avropa-Asiya nəqliyyat dəhlizi ilə bağlı sazişdə düzəlişlər olunub.

Sessiyanın yekunu ilə bağlı əməkdaşlığın inkişaf etdirilməsi istiqamətində bir neçə sənəd imzalanıb.